ეკონომიკისა და მდგრადი განვითარების მინისტრის მოადგილემ თურქმენეთის დელეგაციისთვის საქართველოს საზღვაო პორტებისა და ლოგისტიკური ობიექტების ექსკურსია ჩაატარა. სტუმრები გაეცნენ კომპანია APM Terminals Poti-ს მუშაობას, ასევე მოინახულეს ფოთის ახალი პორტი, რომელსაც Pace Group მართავს.
განსაკუთრებული ყურადღება დაეთმო ანაკლიის ღრმაწყლოვანი პორტის მშენებლობას, სადაც ფსკერის გაღრმავების სამუშაოებს ბელგიური კომპანია Jan De Nul აწარმოებს. თამარ იოსელიანმა დეტალურად ისაუბრა პროექტზე და მისი შემდგომი განვითარების გეგმებზე.
თურქმენულმა მხარემ გამოთქვა ინტერესი საქართველოს პორტებთან ახლოს მდებარე სასაწყობე და ლოგისტიკური ინფრასტრუქტურის გაფართოების მიმართ და განიხილავს ამ სფეროში ინვესტიციების შესაძლებლობებს, რაც ხელს შეუწყობს სატრანსპორტო კავშირებისა და ეკონომიკური თანამშრომლობის გაძლიერებას ქვეყნებს შორის.
