მომავალი ზაფხულის სეზონიდან ბერძნული ავიაკომპანია Sky Express დაიწყებს რეისების შესრულებას მარშრუტზე ჰერაკლიონი–თბილისი–ჰერაკლიონი. ფრენები განხორციელდება 6 ივლისიდან 22 სექტემბრამდე კვირაში ერთხელ — სამშაბათობით, იუწყება საქართველოს სამოქალაქო ავიაციის სააგენტო, რომელმაც უკვე გასცა საჭირო ნებართვა რეისების შესრულებაზე.
Sky Express ქართულ ბაზარზე 2024 წლიდან ოპერირებს და უკვე ახორციელებს რეგულარულ რეისებს ათენი–თბილისი–ათენი. ახალი მიმართულება აფართოებს კომპანიის წარმომადგენლობას და აძლიერებს საჰაერო მიმოსვლას საქართველოსა და საბერძნეთს შორის.
ქვეყნებს შორის მგზავრთნაკადი კვლავ იზრდება: 2025 წელს პირდაპირი რეისებით გადაყვანილ იქნა 284 858 მგზავრი, რაც 29%-ით მეტია 2024 წელთან შედარებით. 2026 წლის ზაფხულის სეზონზე რეისებს შეასრულებენ Sky Express, Aegean Airlines და Wizz Air კვირაში 19 რეისის საერთო სიხშირით.
