აზიის განვითარების ბანკის პრეზიდენტმა მასატო კანდამ შეხვედრა გამართა საქართველოს ფინანსთა მინისტრ ლაშა ხუციშვილთან, სადაც მხარეებმა ქვეყნის სატრანსპორტო, ენერგეტიკული და ციფრული ინფრასტრუქტურის განვითარება განიხილეს. ამის შესახებ კანდამ X-ის სოციალურ ქსელში განაცხადა და ხაზგასმით აღნიშნა, რომ საქართველო ატარებს დაბალანსებულ ფისკალურ პოლიტიკას, რომელიც ხელს უწყობს მაკროეკონომიკური სტაბილურობის შენარჩუნებას.
მისი თქმით, მას შემდეგ, რაც საქართველო 2007 წელს აზიის განვითარების ბანკში გაწევრიანდა, ქვეყანამ დაახლოებით 6 მილიარდი დოლარის ფინანსური მხარდაჭერა მიიღო. ამ დროის განმავლობაში ბანკი რესპუბლიკის ერთ-ერთი უმსხვილესი პარტნიორი გახდა ინფრასტრუქტურული პროექტების განვითარებისა და განხორციელების სფეროში.
შეხვედრაზე ასევე განიხილეს საქართველოს როლის გაძლიერების შესაძლებლობები ე.წ. შუა დერეფანში - აზიასა და ევროპას შორის საერთაშორისო სატრანსპორტო მარშრუტზე. განსაკუთრებული ყურადღება დაეთმო ინოვაციურ ინიციატივებს, მათ შორის ეროვნულ ვალუტაში ობლიგაციების გამოშვებას. მხარეებმა დაადასტურეს თანამშრომლობის გაგრძელების განზრახვა ეკონომიკური ზრდის დაჩქარებისა და ქვეყანაში ცხოვრების დონის ამაღლების მიზნით.
