საქართველოში ავტომობილების ტექნიკური დათვალიერების ღირებულება შესაძლოა შესამჩნევად გაიზარდოს. დარგის წარმომადგენლებმა განაცხადეს, რომ მოქმედი ტარიფები დიდი ხანია არ გადახედილა და უკვე აღარ შეესაბამება არსებულ ეკონომიკურ ვითარებას.
ტექნიკური ინსპექტირების ცენტრების ასოციაციის აღმასრულებელმა დირექტორმა, გიორგი შიოლაშვილმა განაცხადა, რომ სისტემის სტაბილური მუშაობისთვის ტექდათვალიერების ღირებულება დაახლოებით 50%-ით უნდა გაიზარდოს. მისი თქმით, უცვლელი ტარიფები პირდაპირ აისახება თანამშრომლების ხელფასებზე და სერიოზულ პრობლემებს უქმნის მთელ დარგს.
შიოლაშვილმა აღნიშნა, რომ ტექნიკური ინსპექტირების ცენტრები კადრების მაღალი გადინების წინაშე დგანან: ბევრი სპეციალისტი დაბალი შემოსავლების გამო მიდის. ფასების გადახედვის გარეშე თანამშრომლების შენარჩუნება სულ უფრო რთული ხდება, ამიტომ ტარიფების ზრდა ტექდათვალიერების სისტემის ფუნქციონირების შენარჩუნების ერთ-ერთ შესაძლო გზად განიხილება.
