დაღესტნის ხელისუფლება მახაჩკალის აეროპორტიდან ახალი საერთაშორისო მიმართულებების დაწყებას განიხილავს. საუბარია საქართველოსა და ჩინეთთან პირდაპირი საჰაერო მიმოსვლის შესაძლო გახსნაზე. მარშრუტების შემუშავება მიმდინარეობს საჰაერო ნავსადგურის ხელმძღვანელობასთან ერთად, პრიორიტეტულ მიმართულებებს შორის დასახელებულია თბილისი და გუანჯოუ.
მარშრუტების ქსელის განვითარებას ხელს უწყობს ინფრასტრუქტურის მასშტაბური რეკონსტრუქცია. ეროვნული პროექტის „ეფექტური სატრანსპორტო სისტემა“ ფარგლებში შენდება ახალი ასაფრენ-დასაფრენი ზოლი, რომლის სიგრძე 3,2 კმ-ია, ხოლო სიგანე 45 მეტრი. ამჟამად გრძელდება ბეტონის საფარის დაგება და მიმდებარე ტერიტორიის კეთილმოწყობა.
ასევე გათვალისწინებულია პლატფორმის განახლება რვაამდე თვითმფრინავის განთავსების შესაძლებლობით, საჭიროების შემთხვევაში სასწავლო-საწვრთნელი კომპლექსის შექმნა და ექსპლუატაციაში გაშვება. სამუშაოების დასრულების შემდეგ აეროპორტი შეძლებს ნებისმიერი ტიპის საჰაერო ხომალდის მიღებას ამინდის პირობების მიუხედავად, რაც გააფართოვებს მის საერთაშორისო პოტენციალს.
