თბილისის 2026 წლის ბიუჯეტი 17 169 000 ლარით გაიზარდა და ახლა 2 210 558 200 ლარს შეადგენს. შესაბამისი ცვლილებების პროექტი საკრებულომ მუნიციპალიტეტის ანგარიშებზე არსებული ნაშთებისა და მიმდინარე წელს მოსალოდნელი შემოსავლების გათვალისწინებით დაუჭირა მხარი.

საქალაქო საფინანსო სამსახურის უფროსის, გაიოზ თალაკვაძის თქმით, გაზრდილი თანხების პრიორიტეტული მიმართულება სახელმწიფო სკოლების მოდერნიზაცია და მოსწავლეების ტრანსპორტით უზრუნველყოფაა.

ცვლილებები ასევე ითვალისწინებს ქალაქის ინფრასტრუქტურის განვითარების სამსახურისა და რაიონული ადმინისტრაციების დამატებითი საჭიროებებისა და სახსრების გადანაწილების წინადადებებს, რაც საშუალებას მისცემს ბიუჯეტი ქალაქის ყველაზე აქტუალურ პროგრამებსა და ქვეპროგრამებზე მიიმართოს.