საქართველოს ნავთობისა და გაზის კორპორაციამ აუქციონზე ქვეყანაში მოპოვებული 5 მილიონი კუბური მეტრი ბუნებრივი აირი გამოიტანა. ლოტის საწყისი ფასი 1000 კუბურ მეტრზე 648,38 ლარის დონეზეა დადგენილი, რაც დაახლოებით 240 აშშ დოლარის ექვივალენტია (1 აშშ დოლარი/₾2,6995). ვაჭრობის ნაბიჯი 5 ლარი და 40 თეთრია და სწორედ ამ დანამატით ჩამოყალიბდება საბოლოო ღირებულება.

აუქციონის პირობების თანახმად, გაზის შეძენას მხოლოდ საქართველოს გაზის სატრანსპორტო სისტემის მომხმარებლები შეძლებენ, რომლებსაც აქვთ ტექნიკური შესაძლებლობა, მიწოდების პუნქტიდან მოხმარების ადგილამდე მიიტანონ შეძენილი მოცულობა. გარდა ამისა, გაზის ტრანსპორტირებასთან დაკავშირებულ ყველა ხარჯს ვაჭრობის გამარჯვებული იღებს საკუთარ თავზე.

აუქციონი 19 დეკემბრის 15:00 საათამდე გაგრძელდება. მისი შედეგების მიხედვით, ცნობილი გახდება გაზის საბოლოო ფასი და კომპანია, რომელიც მთლიანი გამოტანილი მოცულობის შეძენის უფლებას მოიპოვებს.