თბილისის საერთაშორისო აეროპორტმა პირველად მიიღო რეგულარული შორ მანძილზე მფრენი რეისი შანხაიდან. ახალი მარშრუტი გახსნა ჩინურმა ავიაკომპანია China Eastern Airlines-მა, რომელიც ფრენებს ფართოფუზელაჟიანი Airbus A330-ით ასრულებს.
ჩინეთის უდიდესი ქალაქიდან პირველმა რეისმა საქართველოს დედაქალაქში 274 მგზავრი ჩამოიყვანა, ხოლო საპირისპირო მიმართულებით 283-მა ადამიანმა ისარგებლა. მარშრუტის გაშვების აღსანიშნავად აეროპორტში გაიმართა ოფიციალური ცერემონია საქართველოს მთავრობის, ჩინეთის საელჩოს, TAV Georgia-ს და China Eastern Airlines-ის ხელმძღვანელობის წარმომადგენლების მონაწილეობით.
ახლა საქართველოსა და ჩინეთს შორის პირდაპირ საჰაერო მიმოსვლას სამი ჩინური გადამზიდავი უზრუნველყოფს. ისინი კვირაში სულ 13 რეისს ასრულებენ, რომლებიც თბილისს შანხაისთან, პეკინთან და ურუმჩისთან აკავშირებენ.
China Eastern Airlines შანხაი – თბილისი – შანხაის მარშრუტზე კვირაში სამჯერ იფრენს: ოთხშაბათს, პარასკევს და კვირას. ფრენის დრო თბილისიდან დაახლოებით ცხრა საათია, ხოლო უკან დაბრუნებას დაახლოებით ათი საათი სჭირდება.
TAV Georgia-ში განაცხადეს, რომ ისინი საქართველოს ხელისუფლებასთან ერთად აგრძელებენ მუშაობას ახალი ავიაკომპანიების მოზიდვისა და საერთაშორისო მარშრუტების ქსელის გაფართოების მიზნით. შანხაიდან რეისის გახსნამ უნდა გააძლიეროს ტურისტული, საქმიანი და სავაჭრო კავშირები ორ ქვეყანას შორის.
