საქართველოს მთავრობა პლასტმასის ბოთლებში სასმელების რეალიზაციის აკრძალვას გეგმავს. ამის შესახებ გარემოს დაცვისა და სოფლის მეურნეობის მინისტრის მოადგილემ, სოლომონ პავლიაშვილმა განაცხადა. მისი თქმით, შეზღუდვების ამოქმედება უკვე მომავალ წელს იგეგმება.
გამონაკლისი დაიშვება პლასტმასის ჭურჭელში არსებულ მცენარეულ ზეთზე და 10 ლიტრზე მეტი მოცულობის სასმელ წყალზე. გარდა ამისა, ახალი წესები არ შეეხება ექსპორტისთვის განკუთვნილ პროდუქციას.
ინიციატივა პლასტმასის გამოყენების შემცირების მასშტაბური კამპანიის ნაწილია. წლის დასაწყისიდან ქვეყანაში უკვე აიკრძალა ერთჯერადი პლასტმასის ნაწარმის წარმოება შიდა ბაზრისთვის, ხოლო აპრილიდან სახელმწიფო დაწესებულებებს ეკრძალებათ 3 ლიტრამდე პლასტმასის ჭურჭლისა და ბოთლების შეძენა. ზაფხულში შეზღუდვები გავრცელდება სასტუმროებზე, რესტორნებსა და კაფეებზე.