ADP-ის შემადგენლობაში შემავალმა TAV Georgia-მ თბილისის და ბათუმის საერთაშორისო აეროპორტების მართვის კონტრაქტი ხუთი წლით — 2031 წლის ბოლომდე — გაახანგრძლივა. ახალი შეთანხმების ფარგლებში კომპანია ვალდებულებას იღებს, თბილისის აეროპორტის გაფართოებაში 150 მილიონი დოლარის ინვესტიცია განახორციელოს: კომპლექსის ფართობი 20 000 კვ. მ-ით გაიზრდება და 57 000 კვ. მ-ს მიაღწევს.
TAV Georgia-ს გენერალურმა დირექტორმა თეა ზაქარაძემ განაცხადა, რომ მოლაპარაკებები ბოლო რვა თვის განმავლობაში მიმდინარეობდა და მრავალწლიანი მუშაობის შედეგი გახდა. კომპანია აეროპორტებს 2005 წლიდან მართავს და ინფრასტრუქტურის განვითარებაში 240 მილიონ დოლარზე მეტი აქვს ჩადებული. ამ პერიოდში თბილისში მგზავრთნაკადი 2005 წლის 546 000 ადამიანიდან 2025 წელს 5,4 მილიონამდე გაიზარდა, მიუხედავად პანდემიისა და აგვისტოს ომის შედეგებისა.
TAV Georgia-ში ხაზგასმით აღნიშნეს, რომ თბილისის საერთაშორისო აეროპორტი ვაზიანის ახალი აეროპორტის გახსნამდე მუშაობას გააგრძელებს. განსაკუთრებული ყურადღება დაეთმობა მომსახურების მაღალი დონის შენარჩუნებას და მგზავრთნაკადის შემდგომი ზრდისთვის მზადყოფნას.
