ფედერალური ტერიტორიის სირიუსის საზღვაო პორტი მუშაობას 2026 წლის ზაფხულში დაიწყებს. ამის შესახებ სირიუსის ადმინისტრაციის ხელმძღვანელმა დიმიტრი პლიშკინმა ფედერალური ტერიტორიის საბჭოს სხდომაზე განაცხადა. სამგზავრო ნავსადგურის ამოქმედების შემდეგ, ხელისუფლება გეგმავს საერთაშორისო საზღვაო მარშრუტების გახსნის შესაძლებლობის განხილვას, მათ შორის აფხაზეთის, საქართველოსა და თურქეთის მიმართულებით.
ამჟამად სირიუსში საზღვაო ტერმინალი სამგზავრო პორტად გადაკეთდება. პირველი ეტაპის ამოქმედება 2026 წელს იგეგმება: ჩქაროსნული გემის "კომეტა“-ს მარშრუტი სევასტოპოლი - სოჭი სირიუსამდე გაგრძელდება. მოსალოდნელია, რომ ერთი სეზონის განმავლობაში ამ მიმართულებით დაახლოებით 200 000 მგზავრი ისარგებლებს. გარდა ამისა, 2026 წლის აგვისტოში იგეგმება ორი საექსკურსიო და ორი რეგულარული სატრანსპორტო მარშრუტის ამოქმედება.
ახალ ხაზებზე სამუშაოდ ოთხი გემი შენდება - ორი გემი "სომერსი“ და ორი "კოტლინი“. პორტის განვითარების მეორე ეტაპი, რომელიც 2030 წლისთვის არის დაგეგმილი, ითვალისწინებს საერთაშორისო მარშრუტების გახსნას, რომლის პროგნოზირებული მგზავრთნაკადი სეზონზე 100 000 ადამიანამდეა. 2033 წლისთვის კი ხელისუფლება საზღვაო მიმოსვლის ელექტრო გემებზე გადატანას გეგმავს, რაც ნახშირორჟანგის ემისიების 30 000 ტონამდე შემცირების საშუალებას მისცემს წელიწადში.
