Ant International-ის საერთაშორისო საგადამხდელო პლატფორმა Alipay+ საქართველოს ბაზარზე შემოდის. 27 ოქტომბერს, თბილისში გამართული ფინანსური სამიტის ფარგლებში, ხელი მოეწერა შეთანხმებას, რომლის თანახმადაც ქვეყანაში მისი ექსკლუზიური პარტნიორი Neo Georgian Bank გახდება. ბანკში საგადამხდელო ეკოსისტემის ინტეგრაციას ლიცენზიის მიღების შემდეგ კლიენტებისთვის პირველი მსხვილი ტექნოლოგიური შეთავაზება უწოდეს.

Neo Georgian Bank გეგმავს, საქართველოს საბანკო და ფინანსური სექტორისთვის ტექნოლოგიური და საანგარიშსწორებო ცენტრის ფუნქციები შეასრულოს. Alipay+ 50-ზე მეტი საერთაშორისო საგადამხდელო პარტნიორის მეშვეობით 2 მილიარდზე მეტ მომხმარებლის ანგარიშს აერთიანებს, ხოლო მისი ქსელი მთელ მსოფლიოში 150 მილიონზე მეტ სავაჭრო წერტილს მოიცავს. ინტეგრაციამ უნდა გაამარტივოს ტრანსსასაზღვრო ანგარიშსწორება და დაეხმაროს ქართულ კომპანიებს ჩინეთიდან, სამხრეთ-აღმოსავლეთ აზიიდან და სხვა რეგიონებიდან მომხმარებელთა გადახდების მიღებაში.

პლატფორმა ასევე მისცემს ტურისტებს შესაძლებლობას, საქართველოში QR-კოდების გამოყენებით, მათთვის ჩვეული მობილური საფულეების მეშვეობით გადაიხადონ შენაძენების, კვებისა და განთავსების საფასური. ამან შეიძლება გაზარდოს ანგარიშსწორების მოხერხებულობა უცხოელი სტუმრებისთვის და მხარი დაუჭიროს ტურისტულ ბიზნესს. თავის მხრივ, საქართველოს მცხოვრებლებსა და ადგილობრივ მეწარმეებს შეეძლებათ ისარგებლონ Alipay+-ის საერთაშორისო ქსელით საზღვარგარეთ, მათ შორის აზიაში მოგზაურობისას. გაცხადებული უპირატესობები მოიცავს გადახდების გამარტივებას და საერთაშორისო ტრანზაქციებსა და ვალუტის კონვერტაციაზე ხარჯების პოტენციურ შემცირებას.