ქართულმა ქარხანამ Aero-Structures Technologies — Cyclone, რომელიც Boeing 787-ისა და Boeing 737 MAX-ისთვის კომპონენტებს აწვდის, 2025 წელი $12,8 მილიონი შემოსავლით დაასრულა. ეს წინა წელთან შედარებით $3,4 მილიონით მეტია, თუმცა საწარმოს ხარჯები კვლავ აღემატებოდა შემოსავლებს. შედეგად, კომპანიამ $5,1 მილიონი ზარალი მიიღო.
Cyclone-ის ფინანსური მდგომარეობა რთული რჩება: დაგროვილმა ზარალმა 2025 წლის ბოლოსთვის $79 მილიონს მიაღწია. Elbit Systems–Cyclone-ის მიმართ დავალიანება შეადგენდა $17,5 მილიონს, საქართველოს განვითარების ფონდის მიმართ — $11,2 მილიონს, ხოლო საქართველოს კომერციული ბანკების მიმართ — $4,5 მილიონს. კომპანიამ ასევე დაარღვია საკრედიტო ხელშეკრულების პირობები ერთ-ერთ ბანკთან, რის შემდეგაც დარჩენილი ვალის დაფარვის ვადა 2027 წლამდე გადაიდო.
აუდიტორმა BDO Audit-მა გამოთქვა შენიშვნა ფინანსურ ანგარიშგებაზე, მათ შორის Elbit Systems–Cyclone-ის მიმართ ცალკეული ვალდებულებების დამადასტურებელი ინფორმაციის ნაკლებობის გამო. 2025 წელს ქარხანამ Boeing-ს 240 კომპოზიტური დეტალი მიაწოდა, ხოლო მისი შტატი 165 თანამშრომელს ითვლიდა. საქართველოს განვითარების ფონდს ეკუთვნის Cyclone-ის 66,66%, კიდევ 33,33%-ს აკონტროლებს Elbit Systems; 2026 წლის ივლისში ფონდმა კომპანიის სესხის დაფარვის ვადა ხუთიდან ათ წლამდე გაახანგრძლივა.