ბოლო ერთი კვირის განმავლობაში საწვავის ღირებულება საქართველოში თითქმის ყველა მსხვილ ბენზინგასამართი სადგურის ქსელში გაიზარდა. Gulf-ში ბენზინი 6 თეთრით, ხოლო დიზელი — 16 თეთრით გაძვირდა, Wissol-ში ზრდამ ბენზინზე 5 თეთრი, ხოლო დიზელზე 16 თეთრი შეადგინა. Connect-ში სხვადასხვა სახის საწვავი 15–20 თეთრით გაძვირდა. SOCAR-ში აგვისტოდან ფასები 3–10 თეთრით გაიზარდა.

ამჟამად ბენზინი საქართველოს ბენზინგასამართ სადგურებზე, მარკის მიხედვით, ლიტრზე დაახლოებით 3,75-დან 4,57 ლარამდე ღირს, დიზელი — 3,60-დან 4,78 ლარამდე. Rompetrol-ისა და Lukoil-ის ქსელებშიც ფიქსირდება მსგავსი ფასები, თუმცა ამ კომპანიების ვებგვერდებზე ცვლილებების არქივები არ იძლევა საშუალებას, თვალყური ადევნოთ დინამიკას ანალოგიური პერიოდისთვის.

ივნისსა და ივლისის დასაწყისში ფასების შემცირების შემდეგ, ბაზარი შემობრუნდა ნავთობის ღირებულების ახალი ზრდისა და ახლო აღმოსავლეთში სიტუაციის გამწვავების ფონზე. აგვისტოს დასაწყისიდან საქართველოში სხვადასხვა სახის საწვავი უკვე 13–71 თეთრით გაძვირდა. ნავთობპროდუქტების იმპორტიორთა კავშირსა და კომპანია Wissol-ში მოხმარებისა და ფასების შემდგომ ზრდას ელოდებიან, რადგან საწვავის მიწოდების ახალი კონტრაქტები უკვე უფრო მაღალი ღირებულებით იდება.