საქართველოს სატრანსპორტო და სასაწყობო სექტორის ბრუნვა აგრძელებს ზრდას და 2025 წლის ბოლოსთვის შესაძლოა 11,4 მილიარდ ლარს მიაღწიოს. საინვესტიციო ბანკ Galt & Taggart-ის კვლევის თანახმად, ეს დაახლოებით 9%-ით მეტია წინა წლის მაჩვენებელზე, როდესაც ბაზრის მოცულობა 10,5 მილიარდ ლარს შეადგენდა. ამასთან, დარგის წილი ქვეყნის მშპ-ში სტაბილური რჩება – დაახლოებით 6,1%.
ბოლო წლებში სექტორი საგრძნობლად გაიზარდა: თუ 2019 წელს მისი ბრუნვა 5,8 მილიარდ ლარს შეადგენდა, 2025 წლისთვის მაჩვენებელი თითქმის გაორმაგდა. ბიზნესის ძირითადი ნაწილი თბილისშია კონცენტრირებული – დედაქალაქზე მოდის სატრანსპორტო და სასაწყობო დარგის ბრუნვის დაახლოებით 66%. შემდეგ მოდის სამეგრელო-ზემო სვანეთი 15%-ით, აჭარა 9%-ით და იმერეთი 3%-ით.
პარალელურად, თბილისში აქტიურად ვითარდება სასაწყობო უძრავი ქონების ბაზარი. თუ 2014–2024 წლებში ყოველწლიურად საშუალოდ დაახლოებით 35 ათასი კვადრატული მეტრი სასაწყობო ფართი შენდებოდა, უახლოეს წლებში ეს მაჩვენებელი შესაძლოა გაიზარდოს 180 ათას კვადრატულ მეტრამდე წელიწადში. დედაქალაქში თანამედროვე საწყობების საერთო მოცულობა 2014 წელს 740 ათასი კვადრატული მეტრიდან 2025 წელს 1,26 მილიონ კვადრატულ მეტრამდე გაიზარდა, ხოლო 2027 წლისთვის მოსალოდნელია ზრდა 1,65 მილიონ კვადრატულ მეტრამდე. მაღალი მოთხოვნის ფონზე საწყობების ქირაც გაძვირდა: საშუალო განაკვეთი 2019 წელს თვეში კვადრატულ მეტრზე 2,6 დოლარიდან 2025 წელს 6,3 დოლარამდე გაიზარდა.