ქუთაისის საერთაშორისო აეროპორტში ახალი ასაფრენი ბილიკისა და საჭირო ინფრასტრუქტურის მშენებლობა ფინალურ ეტაპზე გადის. სამუშაოები 2024 წლის ბოლოს დაიწყო, პროექტის დასრულება კი 2026 წლის ბოლომდე იგეგმება. ამის შესახებ კომპანია „საქართველოს აეროპორტების“ გენერალურმა დირექტორმა ლევან მოსეშვილმა განაცხადა.
განახლების შემდეგ, აეროპორტი მიიღებს თანამედროვე სანავიგაციო მოწყობილობებს, რაც საშუალებას მისცემს მიიღოს უფრო დიდი ზომის საჰაერო ხომალდები შეზღუდვების გარეშე. კერძოდ, საუბარია ფართოფრთიან თვითმფრინავებზე, რომლებსაც ადრე აეროპორტის ინფრასტრუქტურის სრულად გამოყენება არ შეეძლოთ.
კომპანიის წარმომადგენლების თქმით, ახალმა ბილიკმა ხელი უნდა შეუწყოს მგზავრთა ნაკადის გაზრდას, დამატებითი სატვირთო გადაზიდვების მოზიდვას და ქუთაისის, როგორც საერთაშორისო საავიაციო კვანძის, როლის განმტკიცებას. პროექტს ახორციელებს სამშენებლო კომპანია „ანაგის“ „საქართველოს აეროპორტების“ დაკვეთით. მშენებლობის საერთო ღირებულება, 2026 წლის სახელმწიფო ბიუჯეტის მიხედვით, 179.5 მილიონ ლარს შეადგენს.